ديوان الشاعر :الشريف سمير بن أحمد الحمدان العضيدان

 


 

][ .. جتك القوافي كنها خيل خيّال .. ][

 

يبطي الزمن يكسر مجاديف رجال
................ويبطي يحطم صرح أصبح حقيقه


ويبطي يهدد حلم وآمال الأجيال
................ويبطي يغير لون واضح بريقه


دام العزوم أشبه بـ هزّات زلزال
................والطيب له فيني علاقه وثيقه


تضيع في الدنيا محطات الإرسال
................وأتعب لأجل تحليل شفره غريقة


ضاعت بـ وسط القاع والحظ لازال
................ يسري بروحي فـ الزفير وشهيقه


جتك القوافي كنها خيل خيّال
................في ساحه الميدان شبّت حريقه


في دوحه الشعار ماجيت محتال
................ولاجيت أدوّر في زماني عشيقه


دام المراجل ما تثمن بالأقوال
................خلك مثال أهل الوجيه الطليقه


اللي ليا من قال تسبقه الأفعال
................يشهد لهم كل الملا والخليقه


واللي بدون أفعال أو شبه تمثال
................خله على فاله وجنب طريقه


مايدري إنه في لياليه وإن طال
................يطرد سراب اللال وألفين ضيقه


مادامك بـ دنياك عابر ورحال
................ودنياك ماوالله تسوى دقيقه


أبعد عن أهل الحسد والقيل والقال
................وعلوم ناسٍ كل أبوها عويقه


اللي يكيل الكيل ويزيد لا كال
................ويسبّ له ناسٍ ويغدر رفيقه


الطيب شمس ولايغطيه غربال
................والمرجله منها شربنا رحيقه


وأنا من اللي عدلوا كل مامال
................في عاليات طويق ربعنٍ عريقه


اللي لهم في عالي الغاط منزال
................بين الجبال الشاهقات بـ مضيقه


في وادي عضيدان منزال الأشكال
................تاريخهم نجمٍ تلامع بريقه


بنوا لهم طيبٍ وعزٍ ومدهال
................ودرب المراجل حافظينٍ طريقه


وحبر القلم مني على طرسكم سال
................غاص البحور المظلمات العميقه


جاكم يثبت لـ الطواريق الأمثال
................ومرصعٍ قافه بـ ماس وعقيقه


جريت من راس الطواريق موال
................وختمتها بـ أجمل ورود الحديقه

 


 

][ .. الشعر يكتبني ليا ضاق خاطري .. ][

 

الشعر ما والله تقفي رحايله
..............ولا رحت أدور في زماني بدايله


اللي ليا ضاقت بعيني الوسيعة
..............سجل هموم القلب ماأكثر جمايله


الشعر يكتبني ليا ضاق خاطري
..............ترجم شعور فـ المعاليق جايله


رافقت شعري من سنين ٍ وسرني
..............لا من زهمت القاف شفنا فعايله


جتني حروف الشعر تطلب مودتي
..............وتسوق من طيب المعاني مثايله


آرد على عدٍ وأنوّخ رحايلي
..............في فيضةٍ منها النواوير سايله


ورثٍ لـ أبوي وجدي الله يرحمه
..............صالوا وجالوا فـ المعاني الجزايله


بنوا لهم بالطيب والعز منزله
..............ودرب المكارم سالكينٍ فضايله


يشهد لهم قبل الرفاقه عدوهم ؟!
..............بـ الطيب وسلوم القبايل دلايله


أسرجت قيفان القصايد لعلني
..............أبقى على نهجه وأحصل حصايله


يالله ترحم من توفوا على الهدى
..............أدعي لهم ربٍ كريمٍ واسايله


وختامها صلوا على سيد البشر
..............اللي بعثه الله لـ نشر الفضايله

 

 


 

 

بيــن السـحاب



بين السحاب وفوق ذيك المحيطات
.................أداعب حروف القصيـد العنيـده



أسج مدري وش تكون البدايـات
...............والدرب موحش والمسافة بعيـده



سجلت شعري من بعيد المسافات
..............للي تحلّـت بالصفـات الحميـده



وأستنّفرت قيفان شعر المهمـات
.............قامت تجيب من اللحون الفريـده



أمـي غلاهـا مايجيبنّـه أبيـات
............مهما كتبت وقلت تبقى الوحيـده



اللي تعنّـت فالليالـي الشديـدات
...........ماظن توفيها حـروف القصيـده



هي الفرح في دنيتي والمسـرات

............يـارب تمهلهـا سنيـنٍ مديـده

 

 

رابط القصيدة في صحيفة الجزيرة في تاريخ 29/ربيع الأول/1429هـ

http://www.al-jazirah.com/2008/20080406/tr8.htm


 


 

قصيدة رحّــال

 

 

رحّال والله من عنا الوقت رحّـال
يضيق بالي بـس مابـاح سـدّي.............
 
عمر الزمن ماياقف بوجه رجّـال
لو هو جمع جيشه صفقته بيـدّي...........
 
ياللي على بعض المخاليق تحتال
قلي علامك واقف اليوم ضـدي ؟...........
 
 
مايثني عزوم الرجاجيـل تمثـال
دام الرجوله ورث من جد جـدي...........
 
 
شفتك ورى ذيك الكواليس تختـال
وأشهرت سيفك بس ماكنت قـدي............
 
 
أشرب من سلوم العرب بس فنجال
قلي وش اللي صار بأسباب صدي..........
 
 
ومادام لي منزال في عالي الجـال
تبطي تشوف الدمع من فوق خدي...........
 
 
رابط القصيده في صحيفة الجزيرة في تاريخ 10 / جمادى الأول / 1429هـ
 
 
 

 

عيد الفطر 

 

سلم على غب البحور وحبّ لي راس القصيد

..............ومد لي جزل المعاني ياهجوسي مدّها

 

 

اليوم في ديرة هلي ومقابل الخشم العتيد

.............خشم على طول الزمن ماباح منه سدّها

 

 

من بعد ماهلّ الهلال حمستها في يوم عيد

............فرحة أهالي ياعسى ربّ العباد يردها

 

 

أرسلتها فوق السحاب في يد ساعين البريد

..............للديره اللي من زمان أحبّها و أودها

 

 

وغلفتها بحبّ الوطن والحب ماينقص يزيد

...............شاعر تغرّب والليالي من زمان يعدها

 

 

سلام يامحفل هلي والعيد ياعلّه سعيد

.............نقيتها من خاطري جزلات وأنتم قدّها

 

 

الغاط رمزٍ للكرم من ماضي العمر البعيد

..............ديرة خوال ملوكنا دار الرجال ومهدها

 

 

يرتاح بالي بوسطها وأحبها حبٍ شديد

..............وزين المثايل لـ أجلها نمدها ونشدها

 

 

ماكنها إلا طفلةٍ لبست من الثوب الجديد

............بين الديار الأوله بالطيب محدٍ ندها

 

 

في عهد أبوفيصل بقت عنوان للعقد الفريد

.............شيخِ على العليا بقى طال الثريا وجدها

 

 

ونايف عضيده من زمن معروف بالراي السديد

..................شيخِ الرجوله والكرم بيده صافح يدها

 

 

سلام يادار الرجال ياتاج راسي والرصيد

............ياأهل الخصال الطيبة صعبٍ علي أعدّها

 

 

غنيتها وغنّى معي ورق على ذاك الجريد

.............وهذي تحيه للوطن تكفى ياطارق ردها

 

 

عن شاعرٍ لأجل الوطن قيفان شعره ماتحيد

..............للديره اللي أرتوينا من ثراها وزندها

 

 

وسلام يامحفل هلي والعيد ياعله سعيد

.............مثايل من خاطري لأجل النشاما نمدّها

 

 


 

 

 

ميزان المراجل

 
 
 
 لو يطول الدرب وتمرّ السنين 
 وتضيع من ريح الليالي خطوتك                 
 
 
وتسابق الأنفاس عثرات الحنين
 وتختفي عن هالمسامع صهوتك                
 
 
 يحدني لذاك الزمن صوتٍ حزين
 يوم المدامع ماأحشمتها هقوتك                
 
 
 أخفيتها والعلم ما والله يبين
 في جرهدٍ عيّا يسامح سطوتك                
 
 
 والسلم وعلوم الرجال الغانمين
 وقفوا عليها يوم ضاعت نخوتك              
 
 
 درب المواني والهوى متخالفين
 أزرت رياح الطيب تشرب قهوتك             
 
 لا صار ميزان المراجل في يدين
 ناسٍ تبيع برخص جعله فدوتك               
 
 
نشرت في جريدة الرياض ، للمتابعه على الرابط أدناه

http://www.alriyadh.com/903105


 

غصن المواداع

 

 

 
لا طار من أرض المحبّه حمامه
ورفّ الجناح وضيعتني حمامتك                   
 
 
لاعاد تطري الحب والإ الكرامه
عالج صوابك وإحتفظ في كرامتك                  
 
 
أصبحت ياصدر الخيانات هامه
وضيعت في درب الوفيين هامتك                  
 
 
والتاجر المعروف لا باع خامه
سهله يفرق بين خامه وخامتك                  
 
 
حطيت في خد النهايات شامه
من يوم مابانت مع الوقت شامتك                
 
 
العام ياضيق السوالف غمامه
واليوم ودعنا المحبّه وغمامتك                  
 
 
ولا طار من غصن الموادع يمامه
لا عاد تطري القرب طارت يمامتك                 
 
 
 

نشرت في جريدة الرياض صفحة خزامى الصحاري للمشاهدة

http://www.alriyadh.com/1003595


غابت وغاب الحظ من يوم قفّت 

 

 

يقول من هو جابها مازرفها

بيوت شعرٍ من صميمه خرفها

 

من وسط غبّات القصايد تنقى

شرايد الأفكار قام وصرفها

 

من علّة فيني من العام تلعب

وذكرى على بالي رفيعٍ شرفها

 

أقفت وأنا مالي على الوضع حيله

واللي على خدي تزايد ذرفها

 

طبع الزمان اللي علينا تعوّد

لامن بنيت أحلام قام وجرفها

 

اللي بنت وسط الضماير منازل

أطهر وجيه الكون قلبٍ عرفها

 

مدّ المفارق في زماني يدينه

موّت عروق القلب وأخفى غرفها

 

راحت وراح العمر معها وقفّى

ولاعاد تهنا لي الحياه وترفها

 

وتبددت أحلام ليلٍ سهرته

والمشهد اللي زلّ أنهى طرفها

 

غابت وغاب الحظ من يوم قفّت

والله يقطع ه السنين وقرفها

 

أقولها والضيق منّي تمكّن

ودفنت طاريها ودمعٍ ذرفها

 

نشرت في جريدة الرياض ،للمشاهدة على الرابط أدناه

http://www.alriyadh.com/917105

 

 


 

قصيده في خاله الشريف علي بن حسن العضيدان صاحب قصر عضيدان في وادي عضيدان 

 

 
 
 
قال الذي لا شاف برّاق نورها
وقام يتغزّل في جزيل بحورها...............
 
وخلّى الهزايل في بحرها تلتطم
ومد الثمينه وإنفتح له سورها................
 
يسوق من راسه مثايلٍ نادره
يقطف فرايدها  وجسر عبورها..............
 
سلام ياشعرٍ  كميته بخاطري
عالي كما اللي حايمات بطورها..............
 
ورثٍ من زحول الرجال الغايبه
عنّا ولكن ماتغيّب دورها.................
 
أسوق من طيب المثايل وأنتقي
للي بعالِ طويق شاد قصورها..............
 
قصرٍ بناه القرم فالوادي الذي
منصى لمن حدته بقعا وجورها................
 
يوم السنين الماضيات الجادبه
للضيف حقٍ من لذيذ تمورها...............
 
سمي على أسم الجد والجد الفخر
يبقى على مر الزمن وعصورها...............
 
ياأبوحسن تسلم ويسلم شاربك
عندك مكان المعضلات وشورها.............
 
في قصرك اللي بالمراجل أمتلا
يوم المزارق مع طويل شبورها................
 
في مجلسك ريح المهيّل والعطر
وريح الشحم خالط يدين صقورها.............
 
وقفاتك اللي بالمواقف شاهده
وسهيل يفرق عن ثراها وثورها.............
 
وختامها صلوا على اللي قادنا
وعلى المحجه  نقتفي دستورها...............
 
 

 

 

قصيدة الرحيل 

 

من رداة الحظ .. يالحظ الهزيل
 
وحلم عمرٍ مات فيني وإرتحل
 
 
حافظك يازين لو طال الرحيل
 
ما بقابي عرق لأجلك ما رحل
 
 
لوّحت يمناك لـ الدرب الطويل
 
دربك أبعد يا حبيبي من زُحل
 
 
تدري إنك بالحشا منت ب قليل
 
والدليل الحال من عقبك نحل
 
 
شاعرك ماعاد يطري له خليل
 
والهوى الخدّاع في عينه ضحل
 
 
يا مواعيد اللقى ضاع الدليل
 
فاقدٍ شوفة عيون أم الكحل..!
 
 
من ثلاث سنين يالطرف الكحيل
 
ضاع دربك والمواني والمحل
 
 
وياسلامي كل مامرّ العليل
 
لـ غاليٍ وسط الحنايا مستحل
 
 
 
 
نشرت في جريدة الرياض على الرابط أدناه 
 
 
 
 

 

الأمــاكن

 

يافلان وين اللي على حبه أدمنت
................ذاك الذي بـ ضلوع قلبي تماكنّ


يهون كل الخلق بس أنت ماهنت
................ياللي على شانه سمعنا الأماكن


مديت له صكّ المحبه وأيقنت
................وأصبح وحيد بداخل القلب ساكن


حتى حياتي لأجله العام عنونّت
................وحتى نجوم الليل بأسمه تحاكن


حفظت حبّه داخل القلب ماخنت
................وهموم قلبي من زماني تراكن


صديت يوم إنك على بعادنا لنت
................وصدقت قول اللي من العام حاكن


خذها شهادة شكر مني وأحسنت

................ياللي تبيع الحب برخيص لكن

 


أبقى على سلم الرجاجيل ماشنت 

................وأقفي لو إن الجرح فيني تماكن 

 

القصيدة نُشرت في جريدة الرياض على الرابط 

 

http://www.alriyadh.com/982961


 


 

 

القصيدة نُشرت في جريدة الرياض على هذا الرابط 

http://www.alriyadh.com/1013273

 

 

 


 

 

 

نُشرت القصيدة في جريدة الرياض على الرابط 

http://www.alriyadh.com/1047066